Ramazan Bayramınız mübarək olsun!
Daha bir mübarək Ramazan ayını arxada qoyaraq, Allah-Təalanın bizlərə lütf etdiyi bayram sevincinə qovuşduq.
Mübarək Qədr gecəsindən sonra bayrama çatmağın nemətini bizlərə bəxş edən Uca Rəbbimizə sonsuz şükürlər olsun.
Bayramlar yalnız zahiri şənliklər deyil, mənəvi saflaşma, könüllərin yaxınlaşması, küsülülərin barışması, yoxsulların və məzlumların sevindiyi müqəddəs anlardır.
Bu günlərdə xüsusilə ehtiyac sahiblərinə yardım əli uzatmaq, xəstələri və yaşlıları ziyarət etmək, şəhid ailələrini unutmamaq, qəbirləri yad etmək müsəlman qardaşlığının və Əhli-Beyt əxlaqının tələblərindəndir.
Rəsulullah (s.ə.s.) bayram günü camaata namaz qıldırar, insanlara sədəqə verməyi tövsiyə edərdi. Bu, bayramın paylaşmaqla gözəlləşdiyinin ən gözəl nümunəsidir.
Bu mübarək günlər xalqımızın milli-mənəvi birliyini gücləndirən, xeyirxahlıq və mərhəmət duyğularını artıran, həmrəyliyin və bəşəri dəyərlərin qorunmasının xüsusi əhəmiyyət kəsb etdiyini xatırladan müqəddəs və gözəl anlardır. Bayram günlərində şəhidlərimizi, qazilərimizi, ehtiyac sahiblərini və məzlumları unutmayaq, əli açıq, qəlbi təmiz, sözü doğru müsəlmanlar olaraq Vətənimiz, Dövlətimiz və bir-birimiz üçün dualarımızı əsirgəməyək.
Allah-Təala sizlərin və bütün müsəlmanların orucunu, dualarını, ibadət və niyyətlərini qəbul etsin.
Ramazan Bayramınız mübarək olsun!